GAZETA STANDARD

E PERDITSHME SHQIPTARE. Kryeredaktor Sami Neza

Kontakt Standard Politike Analiza&Komente Kronike Kulture Dossier Intervista Reportazh Sociale Ekonomi Speciale Kosove Suplementi Lajme nga Bota Aktualitet Rajon

Debat

KURSI I KEMBIMIT
9 Janar
		BLEJ	SHES

	USD	91.50	94.30

	EURO	135.22	139.36

	GBP	144.14	148.55

	CHF	89.16	91.88

SONDAZH

Ky sondazh eshte c'aktivizuar

Mashtrimi i madh me “programin” 1 mijë faqësh

VLADIMIR KARAJ

Nga Vladimir Karaj

Programi i PS-së shndërrohet në mister dhe askush nuk mund të thotë se çfarë kishte në 1 mijë faqet e tij të lidhura në dosje të rënda që nuk u lexua dot as nga anëtarët e kryesisë së partisë.

Askujt nuk do t’i shkonte në mendje 2 muaj para fushatës se kur Edi Rama u paraqit në një emision televiziv me dy dosje të mëdha e të kapura letrash, për të cilat tha se ishin programi “1 mijë faqësh”, në fakt ishin të bardha. Mundet që edhe ata libra të mëdhenj, prej të cilëve Rama tha se do të lexonte, por nuk lexoi as një paragraf, të kenë qenë të shkruara, por nëse kanë qenë me poezi apo me një program politik, kjo mbetet mister.

Dyshimet se bëhej fjalë për letra të bardha erdhën menjëherë pasi fillimit të fushatës dhe faktit që askush nuk mund të citonte qoftë edhe një frazë nga programi 1 mijë faqësh. As pas prezantimit me bujë në kongres dhe as pas lançimit të këngës himn të fushatës, askush nuk publikoi qoftë edhe pak rreshta nga ato që PS, nëse do të vinte në pushtet, do të bënte për shqiptarët.

Ben Blushi, anëtar i kryesisë dhe një nga zërat e pakonformuar me mendimin e kryetarit brenda PS-së, deklaronte në asamblenë e para disa ditëve: “Ne nuk u dhamë shqiptarëve asnjë premtim, sepse nuk i dhamë asnjë program”. Kjo ishte në të vërtetë dëshmia e parë konkrete e një “mashtrimi 1 mijë faqësh”. Më pas, jo vetëm Blushi, por edhe mjaft persona të tjerë me pozita të larta në krye të PS-së, pranuan se ata as që kishin lexuar qoftë edhe një faqe nga programi “1 mijë faqësh”, që edhe tani, 1 muaj pas zgjedhjeve, mbetet po aq i mistershëm dhe intrigues sa përrallat e “1001 netëve”.

Ermira Danaj, koordinatore e gruas në PS, tha për “standard” se ajo i ka dorëzuar Ramës 30 faqe dokument të pjesës së programit që kishte të bënte me gratë. Disa herë Rama u është referuar premtimeve për gratë në konferenca për shtyp, por Danaj thotë se nuk e di çfarë u bë me dokumentin e saj dhe se me programin e partisë si të plotë “nuk është njohur”. Justifikimi i Ramës se askush nuk do ta lexonte një program aq të gjatë nga një anë duket se ka qenë i drejtë, pasi 1 mijë faqe të japin vetëm idenë e një libri pa ide të mirëfillta dhe të qarta dhe ndoshta të palexueshëm.

Por, ndërsa ai ngulmonte se zotëronte këtë program, ata që duhej ta reklamonin atë te zgjedhësit, në kontakte të drejtpërdrejta dhe të përditshme nuk patën shansin të kishin një kopje apo qoftë edhe t’i hidhnin një sy kopjes së vetme që thoshte se zotëronte kryetari. “Dikush thotë se ne kishim një program me 1000 faqe, por unë duhet të pohoj sot se nuk kam parë asnjë faqe të këtij programi. Aq më pak, shqiptarët nuk kuptuan dot se çfarë do bëjmë ne për ekonominë, çfarë do bëjmë për taksat, si do ta ulim papunësinë, si do shpërndajmë të ardhurat e këtij vendi...”, - deklaronte në Asamblenë Kombëtare Blushi. As ai, si anëtar i kryesisë dhe një nga krerët drejtues të Partisë Socialiste dhe i pari në listën e qarkut të Korçës, nuk kishte pasur rastin të lexonte programin 1 mijë faqësh.

Faktikisht, ishte deklarata e Blushit ajo që nxori në sipërfaqe atë që dyshohej nga shumë dhe prej kohësh, që të 1 mijë faqet mund të kenë qenë të bardha. Kjo ndoshta ishte arsyeja se përse njerëzit e PS-së, që u duhej të dilnin në debate televizive, nuk dinin nëse qeverisja e tyre do t’i ulte apo do t’i ngrinte taksat ditën që do të vinte në pushtet. Kjo ishte ndoshta arsyeja se përse të vënë përballë pyetjeve, ata nuk dinin të thoshin se çfarë do të ndodhte me pronat dhe pronarët, legalizimet dhe shumë pjesë të tjera të rëndësishme të programeve politike të partive rivale.

Nuk dihen ende arsyet se përse Rama nuk bëri dot një program apo nëse e kishte një të tillë; përse e mbajti aq sekret, saqë as njerëzit në kryesinë e partisë që ai drejtonte, të mos kishin lexuar pjesë të programit. Angazhimi të paktën sa i përket paraqitjes mediatike i dhjetëra personave në PS për të shkruar programin, por edhe vetë turi i pafund i Ramës nëpër Shqipëri sfumohen totalisht në momentin që askush nuk mund të thotë nëse ata shkruan ndonjë faqe në lidhje me atë që kishin ndërmend të bënin në vend. E vërteta e programit duket se do të mbetet e pazbardhur edhe për një kohë të gjatë dhe ndoshta argumenti më i fortë i kundërshtarëve të brendshëm të kryetarit aktual të PS-së që kërkojnë largimin e tij si ndëshkim pas humbjes.

01/08/2009